Versta staða Ís­lands síðan Lars og Heimir hófu ævin­týrið

Ísland er í 74. sæti á listanum sem birtur var í morgun og hefur ekki verið svona neðarlega í tólf ár, eða síðan að liðið var að hefja sín allra bestu ár í sögunni, undir handleiðslu Svíans Lars Lagerbäck og Eyjamannsins Heimis Hallgrímssonar.

Eftir töpin gegn Kósovó féll Ísland niður um fjögur sæti en Kósovó fór hins vegar upp um tvö sæti og er í 97. sæti.

Nær stanslaus niðursveifla hefur verið hjá Íslandi á listanum síðan Íslendingar urðu minnsta þjóð sögunnar til að keppa á HM, sumarið 2018. Staðan hefur þó haldist nær óbreytt síðasta árið. 

Ísland komst hæst í 18. sæti og var um tíma til að mynda efsta Norðurlandaþjóðin, eftir að hafa verið í 131. sæti á fyrsta ári Lagerbäcks sem aðalþjálfara, með Heimi til aðstoðar.

Mæta liðum í 3. og 119. sæti

Örlitlar breytingar eru á topp tíu listanum sem birtist í morgun því Spánn er kominn yfir Frakkland í 2. sæti og Holland yfir Portúgal í 6. sæti. Argentína er enn efst,m England í 4. sæti og Brasilía í 5. sæti. Belgía er í 8. sæti, Ítalía í 9. sæti og Þýskaland í 10. sæti.

Frakkar verða mótherjar Íslands í undankeppni HM í haust, ásamt Úkraínu sem er í 25. sæti heimslistans og Aserbaísjan sem er komið niður í 119. sæti.