Cecilía að landa silfri og Fanney mætt í markið

Fanney og Cecilía berjast um stöðu aðalmarkvarðar í íslenska landsliðinu og er samkeppnin hörð. Fanney varði markið í fyrra þegar Ísland vann sig inn á EM en Cecilía hefur svo verið í markinu í Þjóðadeildinni í síðustu leikjum eftir að hafa farið á kostum með Inter á Ítalíu, á meðan að Fanney hefur verið að koma sér fyrir í Svíþjóð og hefja sinn atvinnumannsferil.

Eftir að hafa þurft að vera á varamannabekk Häcken fyrstu þrjár umferðir sænsku úrvalsdeildarinnar stóð Fanney Inga í marki liðsins í dag og átti sinn þátt í 3-1 sigri gegn Växjö. Bryndís Arna Níelsdóttir lék fyrsta klukkutímann fyrir Växjö en var skipt af velli skömmu eftir að liðið náði að minnka muninn í 2-1.

Þetta var annar sigur Häcken í röð, eftir töp í fyrstu tveimur deildarleikjunum. Áður en deildarkeppnin hófst lék liðið í sænska bikarnum og þar stóð Fanney í markinu, í sigrum sem komu Häcken í undanúrslit sem fram fara 1. maí.

Cecilía hélt hreinu gegn Roma

Cecilía hefur verið afar dugleg við að halda marki Inter hreinu í vetur og það gerði hún einnig í dag, í 3-0 sigri gegn Roma. 

Sigurinn styrkir stöðu Inter í 2. sæti ítölsku A-deildarinnar og er liðið nú með 45 stig, fjórum stigum á undan Roma og með leik til góða. Inter á þrjá leiki eftir en Roma aðeins tvo og því allt útlit fyrir að Inter endi í 2. sætinu.

Juventus er hins vegar meistari eftir að hafa tryggt sér titilinn í gær með 2-0 sigri gegn AC Milan. Liðið er með 55 stig og á tvo leiki eftir auk bikarúrslitaleiksins við Roma.