Vilja komast í mjúkinn hjá Bandaríkja­for­seta með að gefa honum stór­mót

Embættismenn frá menningar-, fjölmiðla- og íþróttamálaráðuneyti Bretlands eru sagðir hafa spurt stjórnendur Konunglega og forna golfklúbbsins (e. R&A), sem skipuleggur Opna mótið árlega, hvort þeir geti haldið mótið á Turnberry-vellinum í Skotlandi árið 2028. Turnberry er í eigu núverandi Bandaríkjaforseta sem er mikill golfáhugamaður.

Heimildarmenn The Guardian segja ýmist að breska ríkisstjórnin beiti klúbbinn beinum þrýstingi til þess að fá forsetanum mótið eða grennslist aðeins fyrir um hvaða hindranir væru í vegi þess.

„Ríkisstjórnin er að gera allt sem hún getur til þess að nálgast [Bandaríkjaforseta],“ segir einn þeirra við breska blaðið. Eitt af því sem hún hafi gert sé að halda á lofti þeirri hugmynd að Opna mótið snúi aftur á Turnberry-völlinn.

Mikið er í húfi þar sem Bandaríkjastjórn háir nú tollastríð við flest ríki heims og blikur eru á lofti um hvort að hún haldi áfram þátttöku í varnarbandalagi við Bretland og Evrópuríki.

Bandaríski forsetinn er sagður hafa spurt Keir Starmer, forsætisráðherra Bretlands, ítrekað hvort að völlur hans gæti fengið að halda mótið. Völlurinn hefur verið rekinn með tapi undanfarin ár.

Hafa ekki viljað blanda pólitík inn í mótið

Opna mótið hefur verið haldið fjórum sinnum á Turnberry. Til stóð að halda það þar árið 2020 en R&A hætti við það eftir að eigandinn var fyrst kjörinn forseti Bandaríkjanna árið 2016. Golfklúbburinn ítrekað síðar að mótið yrði ekki haldið þar í bráð eftir að stuðningsmenn forsetans réðust á bandaríska þinghúsið 6. janúar 2021. Þáverandi forseti klúbbsins sagðist ekki vilja að fjölmiðlafár í kringum forsetann drægi athygli frá mótinu sjálfu síðast í nóvember.

Síðan þá hafa orðið stjórnarskipti í klúbbnum. Mark Darbon, nýr forseti, sagði í síðustu viku að hann vildi að Turnberry héldi mótið aftur „einhvern tímann“.

Pólitík er þó ekki eina ástæðan fyrir því Turnberry hefur ekki verið talinn fýsilegur kostur til að hýsa Opna mótið. Vinsældir þess hafa vaxið gríðarlega frá því að mótið var haldið síðast á Turnberry árið 2009. Þá komu 123.000 áhorfendur til þess að fylgjast með keppninni. Þeir voru 250.000 talsins á Royal Troon í fyrra. 

Sumir þeirra sögufrægu valla sem hafa hýst mótið í gegnum tíðina eiga því erfitt með það vegna skorts á innviðum og plássi.

Stewart Cink vann síðast þegar Opna mótið var haldið á Turnberry. Hann sigraði goðsögnina Tom Watson sem var þá á sextugasta aldursári og hefði orðið langelsti sigurvegari í sögu mótsins sem nær aftur til 19. aldar.