Þing­menn vilja vita meira um hvers vegna Úlfar hætti störfum

Sigmar Guðmundsson þingmaður Viðreisnar telur hins vegar hér um að ræða ósmekklegt pólitískt moldviðri sem minnihlutinn sé að þyrla upp.

Þessi umræða fór fram undir liðnum um fundarstjórn forseta síðdegis en það var Bergþór Ólason Miðflokki sem reið á vaðið. Hann hafði áður vikið að þessu sama máli í dagskrárliðnum um störf þingsins. Hann sagði að mörgum hafi komið á óvart þegar tilkynnt var að staða lögreglustjórans á Suðurnesjum hafi verið auglýst og enn meira svo þegar vísað var í pólitískar áherslubreytingar sem Þorbjörg Sigríður vilji ráðast í.

Bergþór segir eðlilegt að menn vilji tengja þetta því að Úlfar hefur tjáð sig afdráttarlaust um þá „alvarlegu stöðu sem er að teknast upp á landamærum.“

Vilja vita um hinar pólitísku stefnubreytingar

Bergþór óskaði eftir því að forseti myndi sjá til þess að svigrúm gæfist á þinginu til að ræða málið. 

„Staðan á landamærunum er verri en hún þarf að vera og þegar breytingar eru gerðar með þessum hætti að við séum í það minnsta meðvituð um þær breytingar sem dómsmálaráðherra hyggst ráðast í.“

Rósa Guðbjartsdóttir Sjálfstæðisflokki mætti því næst í pontu og sagðist almennt hlynnt því að stöður væru auglýstar og þær endurskoðaðar en það vekti óneitanlega athygli þegar þetta beri að með þessum hætti. 

„Þar sem segir að ákvörðunin byggi á pólitískum áherslum ríkisstjórnarinnar. Því spyr maður: Hann hefur lýst skoðun sinni á ástandinu en einhverjir gætu túlkað þetta sem þöggun.“

Vilhjálmur Árnason þingmaður Sjálfstæðisflokksins tók undir þetta sem og Sigmundur Davíð Gunnlaugsson formaður Miðflokksins. Sigmundur taldi nauðsynlegt að ræða við ráðherra um að til standi að breyta hlutunum og ástæðan sé pólitísk.

Segja minnihlutan vilja þyrla upp pólitísku moldviðri

Þorsteinn Sæmundsson Miðflokki tók heilshugar undir með félögum sínum; að myndað verði pláss í dagskrá til að hæstvirtur dómsmálaráðherra geti gert þinginu og þjóðinni grein fyrir því hvers vegna nauðsynlegt er að skipta um lögreglustjóra á Suðurnesjum. 

„Hvort þetta sé væntanlegt ráðslag að víkja mönnum frá vegna pólitískra áherslna? Hvað sendur til? Þessu þarf dómsmálaráðherra að gera þinginu grein fyrir.“

Þá var Sigmar Guðmundssyni, þingmanni Viðreisnar, nóg boðið. Hann reis flokksystur sinni dómsmálaráðherra til varnar og sagði það ósmekklegt af hálfu þingmanna Miðflokksins að segja að hér væri um einhvers konar pólitíska aðför að ræða. 

Fullkomlega eðlilegt væri að staðan væri auglýst og það hafi komið skýrt fram í máli ráðherra. Þetta hafi ekkert með frammistöðu lögreglustjóra að gera og ósmekklegt að leggja orð í mun dómsmálaráðherra. 

„Að búa til pólitík úr því er dapurlegt. Kæmi mér á óvart ef ekki væri vænn meirihluti fyrir því á þinginu að staðan væri ekki auglýst.“

Og Guðmundur Ari Sigurjónsson Samfylkingu mætti einnig í pontu og sagðist hreint út sagt hissa að heyra minnihlutann vega með þessum hætti að embættismanni með því að halda því frama að honum hafi verið vikið úr starfi?! Verið væri að fylgja lögum og hann gerði alvarlegar athugasemdir við þetta, hann óskaði eftir því að þingmenn bæru virðingu fyrir borgurum landsins.