Sæ­var Atli sagður á leið í hlýjan faðm Freys

Það er norski miðillinn Nettavisen sem greinir frá að Breiðhyltingurinn hafi náð munnlegu samkomulagi við framherjann fjölhæfa. Hann er nú á leið til Bergen þar sem hann mun taka út aðstæður hjá Brann og gangast undir læknisskoðun.

Hinn 24 ára gamli Sævar Atli hefur leikið með Lyngby frá árinu 2021 og átti meðal annars stóran þátt í ótrúlegri björgun liðsins undir stjórn Freys vorið 2023. Honum tókst ekki að koma í veg fyrir fall liðsins í ár og leikur Lyngby í B-deild danska boltans á næstu leiktíð.

Samningur Sævars Atla við Lyngby er runninn út og hefur hann þrálátlega verið orðaður við Brann enda samband hans og Freys einstaklega gott. Í örstuttu spjalli við Vísi fyrir þónokkru síðan játti Sævar Atli því að hann væri að öllum líkindum að flytja frá Kaupmannahöfn.

Glugginn í Noregi er lokaður sem stendur og mun Sævar Atli því ekki ganga til liðs við Brann fyrr en hann opnar um miðjan júlí. Þar mun hann hitta fyrir Frey og Eggert Aron Guðmundsson sem gekk í raðir liðsins fyrir yfirstandandi tímabil. Brann er sem stendur í 2. sæti norsku deildarinnar.