Ferða­maður ók húsbíl niður göngu­stíg

Sjónarvottur segir húsbílinn hafa ekið eftir göngustígnum einhverja 200 metra en farið svo aftur inn á Laugaveg við Vesturröst. Húsbíllinn sem um ræðir er gerður út til útleigu til ferðamanna af Geysi Motorhome, einni stærstu húsbílaleigu á landinu.

Stöðvarstjóri harmar atvikið og segir vel farið yfir allar helstu umferðarreglur með tilvonandi ökumönnum sem eru kannski ekki með allt á hreinu varðandi akstur við íslenskar aðstæður. Aldrei hafi hann þó búist við því að þurfa að segja einhverjum að aka ekki á göngustígum.

„Fólki er sagt allar almennar umferðarreglur og svoleiðis. Þetta er farið yfir með þeim. Úti er oft ytri hringurinn með réttinn og svona,“ segir hann.

Hann segist munu tala við viðskiptavininn sem um ræðir.

„Aftur á móti erum við ekkert að segja fólki að keyra ekki á gangbrautum,“ segir hann.

„Fólk er eins og fólk er. Það er ekki hægt að stjórna öllu sem það gerir,“ segir hann svo.