Grunur um að nef­hjól úr flug­vél hafi lent á Austur­velli

Þetta segir Ásmundur Rúnar Gylfason, aðstoðarvarðstjóri lögreglunnar á höfuðborgarsvæðinu, í samtali við Vísi. Rúv greindi frá.

Hann segir að lögreglumenn séu við störf á vettvangi þar sem hjólið fannst. Hann hefur ekki vitneskju um að einhver hafi slasast, eða hvort hjólið hafi valdið einhverju tjóni eða skaða.

Hann hafi heldur engar upplýsingar um stærð flugvélarinnar eða hjólsins.

„Þetta er rannsakað sem flugatvik og skoðað sem slíkt, og rannsóknarnefnd samgönguslysa hefur verið upplýst um atvikið,“ segir Ásmundur.

Vélin hafi komið heilu höldnu til lendingar og engan hafi sakað.

Guðjón Helgason, upplýsingafulltrúi Isavia, segir að vél hafi komið til lendingar á Reykjavíkurflugvelli sem vantaði nefhjól.

„Hún lenti á áttunda tímanum og það voru tveir um borð sem fóru frá borði ómeiddir,“ segir Guðjón.

Um sé að ræða kennsluvél.

Hann segir að vélin hafi numið staðar á brautarmótum, og lokað hafi verið fyrir umferð um austur-vesturbrautina í stutta stund. Atvikið hafi haft smávægileg áhrif á umferð um flugvöllinn, þar sem fresta þurfti brottför flugvélar sem átti að leggja af stað á Egilsstaði.

Austur-vesturbrautin verði opnuð á næsta hálftímanum.