Palmeiras fyrsta liðið í átta liða úr­slit

Leikurinn var nokkuð tíðindalítill framan af. Palmeiras sótti mun meira en fór illa með færin og staðan 0-0 að 90 mínútum loknum. Miðað við hvernig leikurinn hafði þróast reiknuðu eflaust margir með að framlengingin myndi bara líða hjá og úrslitin myndu ráðast í vítaspyrnukeppni en varamaðurinn Paulinho var ekki á þeim buxunum.

Á 100. mínútu afgreiddi hann boltann snyrtilega með vinstri í fyrstu snertingu í teignum og setti boltann í fjærhornið. Hann fór svo af velli skömmu seinna vegna meiðsla en skilaði sínu á þeim 30 mínútum sem hann spilaði.

Fyrir markið var xG stuðull Botafogo aðeins 0,36 en liðið lá í sókn í síðari hálfleik framlengingarinnar en náði þó ekki að skora þrátt fyrir að vera manni fleiri síðustu mínúturnar en Gustavo Gomez, fyrirliði Palmeiras, fékk sitt annað gula spjald og þar með rautt á 116. mínútu.

Palmeiras mætir í 8-liða úrslitum sigurvegaranum úr viðureign Benfica og Chelsea sem fram fer nú síðar í kvöld.