Elliot Page frum­sýndi nýju kærustuna á Skóla­vörðu­stígnum

Page birti myndina á Instagram í gær og má þar sjá hann hjúfra sig upp að Shiplett neðarlega á Skólavörðustígnum með Mokka og Hallgrímskirkjuna í bakgrunni. Við myndina skrifaði leikarinn: „🌈 💕“.

Þá birti Shiplett myndband af Page berum að ofan í sjóböðunum í Hvammsvík á Instagram-hringrás sinni og skrifaði við það: „Gleðilegan hinsegin mánuð“. Í Bandaríkjunum er júnímánuður haldinn hátíðlegur sem hinsegin mánuður.

Um er að ræða fyrsta opinbera samband Page síðan hann skildi árið 2021 við kanadíska Emmu Portner. Þau giftust árið 2018 og studdi Emma maka sinn þegar Elliot greindi frá því að hann væri trans í desember 2020. Hjónin skildu í janúar 2021 og greindu síðan frá því að þau hefðu skilið að borði og sæng sumarið á undan.

Þó Julia sé fyrsti opinberi makinn sem Elliot greinir frá eftir skilnaðinn hefur hann áður lýst því yfir að hann væri byrjaður að deita eftir að hann skildi og fór gegnum kynleiðréttingarferli.

Talið er að Page sé staddur hér á landi fyrir tökur á kvikmynd Christophers Nolan um Ódysseifskviðu.