Segja gengið á birgðirnar og hætta við vopnasendingar til Úkraínu

„Þessi ákvörðun var tekin í kjölfar skoðunar á hernaðarstuðningi okkar við önnur ríki í heiminum og til að forgansraða hagsmunum Bandaríkjanna,“ sagði Anna Kelly, talsmaður Hvíta hússins, í yfirlýsingu.

Hún sagði styrk Bandaríkjahers hins vegar óumdeildan.

„Spyrjið bara Íran,“ bætti hún við.

Erlendir miðlar hafa eftir heimildarmönnum að yfirferð varnarmálaráðuneytisins hafi leitt í ljós að gengið hefði á birgðir af sumum vopnum og því yrðu umrædd vopn ekki send til Úkraínu, jafnvel þótt því hefði verið heitið.

Ekki er vitað um hvaða vopn er að ræða.

Bandaríkjamenn eru sagðir hafa séð Úkraínumönnum fyrir vopnum að andvirði 66 milljarða dala. Síðan Donald Trump tók aftur við embætti forseta hafa þeir hins vegar dregið úr stuðningi sínum og þrýst mjög á Evrópuríkin að gera betur.