Hroða­leg meiðsli Musiala setja dökkan blett á HM

Atvikið átti sér stað undir lok fyrri hálfleiks þar sem Musiala renndi sér á eftir bolta við endalínuna en flæktist í Gianluigi Donnarumma, markverði PSG, með þeim afleiðingum að það snérist mjög óeðlilega upp á ökkla Musiala sem var að lokum borinn af velli augljóslega mjög kvalinn.

Þrátt fyrir að ekkert hafi verið gefið út enn um alvarleika meiðslanna má leiða að því líkur að þau séu nokkuð alvarleg enda snérist mjög ónáttúrulega upp á fót Musiala sem gæti verið ökklabrotinn. Hann mun án vafa missa af upphafi næsta tímabils og gæti jafnvel misst af heimsmeistaramóti landsliða næsta sumar ef allt fer á versta veg.

Alþjóða knattspyrnusambandið hefur verið gagnrýnt töluvert fyrir að lengja tímabilið hjá bestu liðum heims með þessu móti og bjóða þannig hættunni á meiðslum heim. Þessi meiðsli munu ekki lækka þær gagnrýnisraddir.