Stálu mynda­vélum fyrir þrjár milljónir: „Grunar að þessu hafi verið stolið eftir pöntun“

„Við erum bara fegin að það hafi ekki verið neinn inni í búðinni, því yfirleitt er búðin full af fólki. Mæður með ung börn og svona,“ segir Bergur Gíslason eigandi Ljósmyndavara í samtali við fréttastofu.

Hann lýsir atburðarásinni þannig að á tuttugu sekúndum hafi maður vopnaður verkfærum og annar maður vopnaður handslökkvitæki gengið inn í verslunina, brotið glerskáp, tekið valda hluti úr skápnum og gengið út aftur. 

„Þeir vissu alveg hvað þeir ætluðu að taka. Mann grunar að þessu hafi verið stolið eftir pöntun. Það var ekkert hik, það var ekkert eitthvað: Bíddu á ég að taka þetta, á ég að taka þetta?“ segir Bergur.

Blessunarlega séu græjurnar tryggðar og þjófarnir hafi ekki ógnað starfsfólkinu. 

„Líf starfsfólksins og kúnnanna er meira virði en eitthvað dót sem er hægt að panta aftur.“

Bergur segir málið hafa verið tilkynnt til lögreglu sem rannsaki málið.

Myndband af þjófnaðinum má sjá hér að neðan.