Arna semur við Vålerenga

Vålerenga greindi frá skiptunum á vefsíðu sinni í dag. Arna komi til með að fylla skarð Matilde Lundorf sem meiddist á dögunum.

Arna verður 23 ára gömul í ár og gekk í raðir FH frá Val fyrir tímabilið 2024. Hún hefur verið öflug með FH-ingum sem hafa farið mikinn í Bestu deild kvenna í sumar og situr í 2. sæti. FH lenti þá í öðru sæti í Mjólkurbikarnum eftir tap fyrir Breiðabliki í úrslitum.

Arna gengur nú í raðir norsku meistaranna en Vålerenga situr sem stendur í öðru sæti norsku úrvalsdeildarinnar. Hún hittir Sædísi Rún Heiðarsdóttur í Noregi, sem er leikmaður félagsins.