Danski lyfja­risinn að baki Ozempic segir upp þúsundum manna

Niðurskurðurinn kemur í kjölfar lækkandi tekna fyrirtækisins vegna aukinnar samkeppni á markaði með þyngdarstjórnunarlyf. Alls starfa 78.400 manns fyrir Novo Nordisk en þeim fækkar um ellefu prósent með uppsögnunum sem voru kynntar í dag. Fyrirtækið ætlar með þeim að spara um átta milljarða danskra króna, jafnvirði um 153 milljarða íslenskra króna, fyrir lok næsta árs.

Í kjölfar velgengni Ozempic og Wegovy var Novo Nordisk um tíma verðmætasta fyrirtæki Evrópu. Hlutabréf fyrirtækisins voru metin á meira en sem nam vergri landsframleiðslu Danmerkur. Gengið í kauphöllinni hefur hins vegar tekið dýfu upp á síðkastið.

Fyrirtækið rak Lars Fruergaard Jørgensen, forstjóra sinn til átta ára, til þess að reyna að snúa gengi þess við í maí. Novo Nordisk stendur nú frammi fyrir aukinni samkeppni frá bandaríska lyfjarisanum Eli Lilly um viðskipti þeirra sem vilja eða þurfa að losna við aukakíló.

Ozempic var upphaflega þróað sem lyf gegn sykursýki en það reyndist síðan gagnast til þyngdartaps.