Jón vísar um­mælum Rögn­valdar til föður­húsanna

Styr hefur staðið um dómaranefnd KKÍ eftir að alþjóðadómarinn Davíð Tómas Tómasson greindi frá því að hann væri hættur að dæma vegna ósættis við dómaranefndina.

Tvíburarnir Helgi og Sigurður Jónssynir, sem dæmdu ungir í efstu deild, hafa einnig lýst því hvernig þeir heltust úr dómaralestinni. Báðir upplifðu sem svo að þeim hefði verið ýtt til hliðar úr dómarastéttinni.

Jón fór einnig yfir samskipti sín við dómaranefnd þegar hann ætlaði að snúa aftur í dómgæslu fyrir nokkrum árum. Honum fannst ekki mikil til svara dómaranefndar á þeim tíma koma og fannst hann koma að lokuðum dyrum þar.

„Ég fékk ekki nein bein svör. Ég kom inn með mikla reynslu og gott orð en mér var sagt að það væru aðrir á þeim stað sem ég var að reyna að komast á. Það var allt og sumt,“ sagði Jón í samtali við Vísi.

Rögnvaldur tók til varna fyrir dómaranefndina í pistli á Facebook. Hann sagði að tvíburarnir hefðu ekki gert fyrirvara um forföll þegar dómurum var raðað niður á leiki og þá hafi þeir átt í deilum við að minnsta kosti einn dómara um tilhugun aksturs í leiki.

Hvað Jón varðar segir Rögnvaldur hann vera frábæran dómara og sterkan karakter. Hann segir jafnframt að Jón hafi ekki viljað dæma leiki í öðrum deildum en þeim efstu þegar hann sneri aftur í dómgæslu.

Jón segir þetta af og frá í pistli á Facebook. Hann hafi alltaf dæmt þá leiki sem honum hafi verið úthlutaðir og aldrei litið svo stórt á sig að hann myndi ekki dæma leiki í öðrum deildum en þeim efstu eða yngri flokkum.

Þegar Jón hafi dæmt þá leiki sem honum voru úthlutaðir í neðri deildum og yngri flokkum, eftir að hann sneri aftur, hafi hann haft samband við dómaranefnd þar sem hann hafi ekkert heyrt frá henni í nokkrar vikur. Jón spurði hvort ekki væri hægt að nýta krafta hans í efstu deildum en honum var tjáð aðrir dómarar væru framar í goggunarröðinni og að hans tími myndi koma. Ekki væri spurning um hvort heldur hvenær.

Ekkert varð hins vegar af endurkomu Jóns en hann segir að það hafi alfarið verið hans ákvörðun að hætta að dæma. Hann hafi ekki skynjað mikinn áhuga né vilja hjá dómaranefnd að fá hann aftur í dómgæslu, þrátt fyrir orð um annað. Í niðurlagi pistilsins segir Jón:

Niðurstaðan er sú að lok ferils míns voru alfarið mín eigin ákvörðun. Sú ástæða lá að baki að mér virtist sem dómaranefndin, sem sagðist hafa fagnað endurkomu minni, hefði hvorki mikinn áhuga né vilja til að styðja mig við að komast aftur á þann vettvang sem ég taldi (og tel enn) mig eiga erindi á.

KKÍ tjáði sig um gagnrýnina á störf dómaranefndar í síðustu viku en sagðist ekki vilja, eða vera heimilt að, tjá sig um málefni einstaklinga eins og Davíðs. Þau séu viðkvæm og þeim þyki miður að ekki hafi tekist að leysa úr ágreiningnum.

Davíð var valinn dómari ársins á lokahófi KKÍ 2023 og Jón fékk þá viðurkenningu 2012.