Sjáðu Meistaradeildarmörkin hjá manninum sem United gat ekki notað

Arsenal, Paris Saint-Germain og Qarabag unnu sína leiki í gær og eru því með fullt hús eins og Bayern München, Real Madrid og Inter Milan.

Ein af stóru hetjum gærkvöldsins var danski framherjinn Rasmus Höjlund. Höjlund fann sig ekki hjá Manchester United og var lánaður til Napoli. Höjlund skoraði bæði mörk Napoli í 2-1 sigri á Sporting í Meistaradeildinni í gærkvöldi en þau komu bæði eftir stoðsendingar frá Kevin De Bruyne.

Gabriel Martinelli og Bukayo Saka skoruðu mörk Arsenal í 2-0 sigri á Olympiacos á Emirates. Mörkin komu í byrjun og lok leiks.

Erling Haaland kom Manchester City tvisvar yfir á móti Mónakó en City varð að sætta sig við jafntefli. Jordan Teze jafnaði metin í fyrri hálfleik og Eric Dier skoraði síðan jöfnunarmarkið úr vítaspyrnu undir lok leiksins.

Ferran Torres kom Barcelona yfir á móti Paris Saint-Germain eftir stoðsendingu frá Marcus Rashford en þeir Senny Mayulu og Goncalo Ramos tryggðu Evrópumeisturum PSG sigurinn.

Anthony Gordon skoraði úr tveimur vítaspyrnum og þeir Nick Woltemade og Harvey Barnes voru einnig á skotskónum í 4-0 sigri Newcastle á Union St.Gilloise.