Byrjunar­lið Ís­lands: Ein breyting frá lokaleiknum á EM en ekkert ó­vænt

Langt er liðið síðan landsliðið spilaði síðast en það var gegn Noregi á EM í sumar. Frá þeim leik gerir Þorsteinn eina breytingu, þar sem Hlín Eiríksdóttir kemur inn á kantinn fyrir Kötlu Tryggvadóttur, en engar aðrar eða óvæntar breytingar eru gerðar.

Nýliðarnir í hópnum; Thelma Karen Pálmadóttir, Vigdís Lilja Kristjánsdóttir og María Catharina Ólafsdóttir Gros eru allar á bekknum.

Fyrirliðinn Glódís Perla Viggósdóttir er á sínum stað í vörninni og stöllurnar Sveindís Jane Jónsdóttir og Karólína Lea Vilhjálmsdóttir einnig í sínum stöðum.

Þorsteinn hefur vanið liðið á 4-2-3-1 leikkerfi, með Karólínu fremsta á miðjunni, en spennandi verður að sjá hver stillir sér upp sem framherji og hverjar verða á kantinum, þær stöður hafa verið svolítið fljótandi.

Markmaður

• Cecilía Rán Rúnarsdóttir

Varnarmenn

• Guðrún Arnardóttir
• Glódís Perla Viggósdóttir
• Ingibjörg Sigurðardóttir
• Sædís Rún Heiðarsdóttir

Miðjumenn

• Hildur Antonsdóttir
• Alexandra Jóhannsdóttir
• Karólína Lea Vilhjálmsdóttir

Framherjar

• Hlín Eiríksdóttir
• Sveindís Jane Jónsdóttir
• Sandra María Jessen

Leikur Norður-Írlands og Íslands hefst klukkan 18 og verður í beinni textalýsingu á Vísi.