Breyttur veru­leiki ís­lensks íþróttafólks

Fremsta íþróttafólk landsins í einstaklingumgreinum hefur í fjöldamörg ár kallað eftir breytingum á launa- og styrkjakerfi ÍSÍ svo þau geti notið álíka réttinda og fólk á vinnumarkaði. Áföll, óvæntar uppákomur eða missir á styrktarfé hefur getað orðið til mikils ama.

Breyting varð á í gær þegar 38 af fremsta íþróttafólki landsins var skráð á launaskrá hjá ÍSÍ, í gegnum nýjan launasjóð sambandsins. Með því hljóta þeir einstaklingar réttindi sem íþróttafólki hefur ekki boðist áður.

Því getur það verið laust við stærstu fjárhagsáhyggjurnar og einblínt betur á að gera betur innan vallar.

„Fyrir mig og dansferilinn minn skiptir mestu máli að geta slakað á. Að hafa ekki þessar fjárhagsáhyggjur í lok hvers mánaðar, ekki hvernig á að ganga upp næsti mánuður og svo næsti. Þetta gefur manni öryggi að geta einbeitt sér að því sem skiptir máli í íþróttum,“ segir dansarinn Sara Rós Jakobsdóttir sem hefur gert það gott á alþjóðavísu ásamt félaga sínum Nicoló Barbizi í latín- og ballroom-dönsum. Þau hafa meðal annars sinnt húsþrifum í Danmörku til að fjármagna keppnisferilinn.

„Það er mjög mikið púður sem fer í það. Maður finnur vinnu á einum stað og svo á öðrum stað, þar sem maður ferðast mikið og æfir mikið. Maður heldur ekki einni vinnu og vill einbeita sér að íþróttinni. Það er alltaf púsluspil að finna innkomu í hverjum mánuði. Þetta breytir öllu fyrir okkur,“ segir Sara enn fremur.

Besta jólagjöfin

Sóley Margrét Jónsdóttir, kraftlyftingakona, sem var önnur í vali á íþróttamanni ársins á síðasta ári, segist vart hafa getað óskað eftir betri jólagjöf í ár.

„Þetta er besta jólagjöfin hingað til. Þetta skiptir máli því maður getur minnkað vinnu og lagt 100 prósent fókus á kraftlyftingarnar, sem hefur verið draumurinn lengi. Það er loksins komið að því,“ segir Sóley. Hún hefur ekki glímt við sömu áhyggjur um mánaðarmót en getur skipt frosnu fæði út fyrir ferskt.

„Það er kannski ekki stress í kringum mánaðarmótin. Maður er sparnaðarsamur og borðar frosinn mat. Maður getur kannski farið að borða ferskan mat, það er jákvætt,“ segir Sóley létt og bætir við:

„Þetta munar fáránlega miklu. Ég er svo þakklát. Markmiði náð.“

150 til 200 prósent vinna

Atvinnukylfingurinn Guðrún Brá Björgvinsdóttir hefur ferðast víða um heim í keppnisferðalögum undanfarin ár.

„Þetta munar öllu. Þetta tekur smá pressu af manni varðandi pressu og fjármál. Maður getur forgangsraðað betur því sem maður er að gera. Maður er að vinna með þessu og þá getur maður kannski aðeins sett meiri tíma í að æfa sig og gera það sem skiptir máli til að ná árangri,“ segir Guðrún.

Eygló Fanndal Sturludóttir, ólympísk lyftingakona, sem var þriðja í vali á íþróttamanni ársins í fyrra segir gott að réttindi fylgi því sem svo mikið púður fer í.

„Þetta er mjög góður dagur. Þetta er frábært að heyra og gaman að fá að vera hérna og vera partur af þessu. Þetta breytir mjög miklu. Þetta er meira en 150 og 200 prósent vinna. Maður gerir ekkert annað allan sólarhringinn en að hugsa um æfingar og hvernig hægt er að hámarka allt. Það er gott að geta gert það og ekki haft áhyggjur af fjármálunum. Það er mjög mikils virði,“ segir Eygló.

Minni áhyggjur meiri stöðugleiki

Skíðakonan Hólmfríður Dóra Friðgeirsdóttir býr sig undir heimsbikarmót víða um heim og stefnir á Vetrarólympíuleika. Hún segir stórt skref tekið.

„Þetta er risastórt skref fyrir íþróttahreyfinguna og okkur afreksíþróttafólk á Íslandi. Ég er mjög stolt að vera hluti af þessum hópi,“ segir Hólmfríður og bætir við:

„Þetta veitir manni ákveðið fjárhagslegt öryggi og það er góð tilfinning að hægt sé að áætla ákveðnar tekjur á mánuði. Það er góð innspýting inn í tímabilið,“

„Ég hef verið heppin með styrktaraðila og er ótrúlega ánægð að hafa þá með mér í liði. En þú getur stundum misst styrktaraðila og færð ekki endilega inn nýja. Með launasjóðnum veitir það meira jafnvægi. Þetta er mjög gott. Það eru minni áhyggjur og meiri stöðugleiki,“ segir Hólmfríður.

Ummæli afrekskvennana má sjá í spilaranum að ofan.