Gramir að næstu göng á lista séu ekki á Austur­landi

Eins og fjallað hefur verið um hefur mikillar óánægju gætt hjá Austfirðingum vegna breyttrar forgangsröðunar í nýrri jarðgangaáætlun, þar sem Fjarðarheiðagöngin eru sett á ís og Fjarðagöng sett í forgang. Stefán Þór Eysteinsson oddviti Fjarðalistans segir jákvætt að samgönguáætlun sé loks komin fram þó þar sé ýmislegt sem fetta megi fingur út í.

„Með gangnaframkvæmdir á svæðinu þá er þeim að seinka töluvert, ég skil auðvitað mjög vel áhyggjur manna af því að gangnaframkvæmdum sé að seinka á svæðinu og að næsta gangnaframkvæmd sé ekki á Austurlandi. Það er eitthvða sem maður hefði viljað sjá,“ segir Stefán Þór. 

Helst hefði hann viljað sjá að næstu jarðgöng sem ráðist verður í væri á Austurlandi, en nú eru Fljótagöng efst á lista.

„Ég held að það sé hiti í mörgum að þessi framkvæmd sem var í forgangi á Austurlandi sé að færast annað.“

Íbúar í Fjarðabyggð séu mjög hugsi.

Ég held að það séu mjög blendnar tilfinningar. Ég held að fólk hafi mikla samúð með því að næstu göng séu ekki Fjarðaheiðargöng og að næstu göng séu ekki á Austurlandi. Ég held það sé aðallega það sem menn eru að horfa í, að næsta gangnaframkvæmd sé ekki hér á svæðinu,“ segir Stefán.