Ætla að herða lög um byssur enn frekar eftir á­rásina

Enn sem komið er liggja ekki miklar upplýsingar fyrir um feðgana. Faðirinn, sem var fimmtugur og hét Sajid Akram, var felldur af lögregluþjónum en hann flutti til Ástralíu árið 1998 og var þá námsmaður. Ekki liggur fyrir hvaðan hann kom upprunalega en hann var með ástralskan ríkisborgararétt.

Sonur hans heitir Naveed Akram og er 24 ára gamall en hann fæddist í Ástralíu. Hann var særður og er á sjúkrahúsi.

Hann var til rannsóknar af leyniþjónustu Ástralíu í um hálft ár árið 2019 og hafa fjölmiðlar sagt að það hafi verið vegna meintra tengsla hans við ISIS-liða í Ástralíu.

Saman réðust þeir á samkomu gyðinga á Bondi-strönd en heimildarmenn fjölmiðla í Ástralíu segja að tveir ISIS-fánar hafi fundist í bíl feðganna.

Sajid var með skotvopnaleyfi og var skráður eigandi sex byssa. Lögreglan segir að byssurnar hafi allar fundist á vettvangi árásarinnar. Myndefni af vettvangi sýnir feðgana vopnaða bæði haglabyssum og rifflum.

Vilja takmarka hvað menn mega eiga margar byssur

Anthony Albanese, forsætisráðherra, fundaði í gær með leiðtogum ríkja Ástralíu í morgun þar sem þeir ræddu meðal annars það að herða lögin um byssur í landinu. Þar munu allir hafa verið einróma um að grípa til aðgerða.

Sjá einnig: Skotinn tvisvar eftir að hafa tæklað annan skot­manninn

Lög um skotvopn þykja frekar ströng í Ástralíu en löggjöfin var hert verulega í kjölfar mannskæðrar skotárásar í Port Arthur árið 1996. Þá myrti einn maður 35 manns.

Meðal þess sem verið er að skoða núna, samkvæmt frétt Ríkisútvarps Ástralíu, er að flýta gerð landslægrar vopnaskrár, takmarka fjölda skotvopna sem einstaklingur má eiga og setja frekari takmarkanir á hvers lags byssur löglegt er að eiga.

Þá er einnig til skoðunar að takmarka innflutning byssa og þrívíddarprentun skotvopna.