Hundrað og fjöru­tíu milljarða bóta­krafa á Sam­herja sé súrrealísk

Fimm ára rannsókn embættis héraðssaksóknara á Samherjamálinu svokallaða lauk í júlí á þessu ári en enn hefur ekki verið tekin ákvörðun um hvort það verði ákært í málinu. Níu manns fyrrverandi eða núverandi starfsmenn Samherja eru með réttarstöðu sakbornings. Málið kom upp eftir þátt Kveiks þar sem fjallað var um starfsemi Samherja í Namibíu og meint mútubrot, peningaþvætti og auðgunarbrot.

Í nóvember kom fram í umfjöllun RÚV að Í Namibíu sitja tíu menn, þar á meðal tveir ráðherrar, í varðhaldi og bíða þess að réttarhöld hefjist í máli þeirra. Þeir eru ákærðir fyrir að hafa þegið milljarða frá Samherja, nýtt sér aðstöðu sína og áhrif, til að færa Samherja aðgang að auðlindum namibísku þjóðarinnar.

Fyrirtækið sé stofnað til að stefna Samherja 

Baldvin Þorsteinsson forstjóri Samherja var í viðtali í Bítinu á Bylgjunni í morgun og upplýsti að fyrirtækinu hefði verið stefnt vegna málsins í Bretlandi. Hann segir í samtali við fréttastofu að stefnan nemi gríðarlegum fjárhæðum.

„Við fengum stefnu þar sem okkur er stefnt fyrir dómstólum í Bretlandi.  Af fyrirtæki sem er stofnað í þeim tilgangi að gera kröfu á hendur okkur vegna starfsemi í Namibíu. Það er gert af hálfu ríkisfyrirtækis í Namibíu sem hefur hingað til ekki gert neinar kröfur á okkur en er þá búið að framselja réttinn til fyrirtækis í Englandi og fer fram á háar skaðabætur.

Hann segir kröfuna óvenjulega. 

„Bótakrafan hljóðar upp á um hundrað og fjörutíu milljarða króna. Þessi upphæð er hærri en eigið fé fyrirtækisins. Þetta er nýtt og hljómar súrrealískt. Ég er ekki búinn að hugsa til enda hvaða áhrif það myndi hafa ef við töpum málinu,“ segir Baldvin.  

Rökstuðningur eftir áramót

„Við eigum eftir að fá nánari rökstuðning fyrir kröfunni.  Þetta er svona ferill þar sem við erum látin vita. Við höfum aðeins fengið að sjá ofan í kröfuna en það kemur þá í upphafi næsta árs. Við eigum líka eftir að fá betri upplýsingar um hvaða fyrirtæki þetta er sem sér um stefnuna,“ segir Þorsteinn.  

Hann segir að málið verði tekið fyrir í breskum dómstól á seinni hluta næsta árs og Samherji sé byrjaður að undirbúa sig fyrir málaferlin.

„Við erum komin með lögmenn í Bretlandi sem munu verja okkar hagsmuni og hefja undirbúning þegar stefnan verður birt í heild sinni. Það er kostnaðarsamt að reka mál fyrir breskum dómstólum og ljóst að þetta mun taka orku, tíma og fjármuni frá fyrirtækinu ,“ segir hann.

Vonast eftir niðurstöðu sem allra fyrst

Aðspurður um hvernig Samherji  svarar ásökunum í Samherjamálinu sem nú er hjá héraðssaksóknara svarar Baldvin:

„Þetta eru þungar ásakanir og eðlilegt að þetta mál sé í rannsókn og við bíðum eftir niðurstöðu úr henni. Rannsókn málsins er nú lokið og er beðið eftir hvort það verði ákært eða ekki. Þetta er búið að taka mjög langan tíma og þeir sem liggja undir ámæli í málinu eru orðnir mjög langþreyttir á því að fá ekki niðurstöðu í það. Ég vona að niðurstaða komist í málið sem allra fyrst.“