Fremsta í­þrótta­fólk ársins kemur úr fót­bolta og frjálsum

Annað árið í röð er það sænski stangastökkvarinn Armand Duplantis sem endaði efstur í kjörinu á íþróttakarli ársins í heiminum.

Íþróttakona ársins er spænska fótboltakonan Aitana Bonmatí sem hafði lent í 2. sæti í kjörinu í fyrra og í 3. sæti árið þar áður.

Það voru íþróttafréttamenn frá 121 landi sem tóku þátt í kjörinu en í þeim hópi var þó enginn úr hinum íslensku Samtökum íþróttafréttamanna.

Duplantis hlaut 1.182 stig í kosningunni en hann vann öll mót sem hann keppti í á árinu, bæði innan- og utanhúss. Hann sló heimsmet sitt fjórum sinnum í ár, með því að fara yfir 6,27 metra í Clermont-Ferrand, yfir 6,28 metra í Stokkhólmi, yfir 6,29 metra í Búdapest og loks yfir 6,30 metra þegar hann varð heimsmeistari í Tókýó. Hann hefur nú alls slegið heimsmetið fjórtán sinnum frá því í febrúar 2020.

Af tíu efstu íþróttakörlunum voru fimm fótboltamenn.

Topp tíu karlar:

1. Armand Duplantis (Svíþjóð) – Frjálsar íþróttir – 1182
2. Carlos Alcaraz (Spánn) – Tennis – 784
3. Ousmane Dembele (Frakkland) – Fótbolti – 713
4. Achraf Hakimi (Marokkó) – Fótbolti – 531
5. Tadej Pogacar (Slóvenía) – Hjólreiðar – 410
6. Lamine Yamal (Spánn) – Fótbolti – 332
7. Kylian Mbappe (Frakkland) – Fótbolti – 274
8. Jannik Sinner (Ítalía) – Tennis – 219
9. Luka Doncic (Slóvenía) – Körfubolti – 192
10. Mohamed Salah (Egyptaland) – Fótbolti – 191

Bonmatí hlaut langflest stig kvenna eða 824. Þessi 27 ára fótboltakona, sem nú er á meiðslalistanum eftir fótbrot en gæti mætt Íslandi í undankeppni HM í mars, átti magnað ár. Hún var valin besti leikmaður bæði Meistaradeildar Evrópu og Evrópumótsins í Sviss, þrátt fyrir að lið hennar Barcelona og Spánn hafi þar orðið að sætta sig við silfur í báðum tilvikum. Hún vann þrefalt á Spáni með Barcelona-liðinu.

Fimm frjálsíþróttakonur voru á meðal tíu efstu íþróttakvennanna í kjörinu eins og sjá má hér að neðan.

Topp tíu konur:

1. Aitana Bonmatí (Spánn) – Fótbolti – 824
2. Beatrice Chebet (Kenía) – Frjálsar íþróttir – 453
3. Aryna Sabalenka (Hvíta-Rússland) – Tennis – 446
4. Sydney McLaughlin-Levrone (Bandaríkin) – Frjálsar íþróttir – 393
5. Femke Bol (Holland) – Frjálsar íþróttir – 356
6. Mariona Caldentey (Spánn) – Fótbolti – 298
7. Coco Gauff (Bandaríkin) – Tennis – 281
8. Faith Kipyegon (Kenía) – Frjálsar íþróttir – 257
9. Federica Brignone (Ítalía) – Alpagreinar – 256
10. Valarie Allman (Bandaríkin) – Frjálsar íþróttir – 251

Þess má geta að kjörinu á íþróttafólki ársins á Íslandi verður lýst í Hörpu á laugardagskvöld, 3. janúar.