Fann liðsfélaga sinn látinn

Botn sagði frá því í viðtalinu að hann og Bakken hafi ætlað í skíðaferð morguninn sem Sivert Bakken fannst látinn.

„Ég og Sivert ætluðum í skíðaferð klukkan níu þennan morgun. Ég ætlaði að koma við til að ná í bíllykilinn til að taka skíði og stafi úr bílnum, en þá fann ég hann líflausan í herberginu. Þetta var algjört áfall og skelfing. Það fyrsta sem maður gerir er að reyna að hjálpa,“ segir Johan-Olav Botn við TV2.

Náði ekki sambandi við neyðarlínuna

Hann segir enn fremur að hann hafi reynt að hringja í neyðarnúmer en ekki náð sambandi.

Bakken fannst látinn á hótelherbergi sínu á Þorláksmessu í einkaæfingabúðum í Lavazé á Ítalíu. Norska skíðaskotfimissambandið hefur greint frá því að Bakken hafi verið með grímu á sér þegar hann fannst. Þetta er súrefnisgríma sem líkir eftir því að vera í mikilli hæð þar sem minna súrefni er í andrúmsloftinu.

Dánarorsök er enn ókunn og því er óvíst hvort tengsl séu milli andlátsins og grímunnar.

Á þriðjudag staðfesti lögmaður fjölskyldunnar að krufningarskýrslan úr réttarmeinafræðilegu rannsóknunum kæmi ekki fyrr en í mars.

Þáði sálfræðiaðstoð

„Ég hef því miður fylgst með öllum vangaveltunum. Ég óska þess að fólk virði aðstandendur, forðist vangaveltur og bíði með að draga ályktanir þar til rannsókn er lokið,“ segir Botn við sjónvarpsstöðina.

Hann segir einnig að hann hafi fengið boð um – og þegið – sálfræðiaðstoð á vegum Ólympíunefndarinnar.

„Það eru nokkrar myndir í höfðinu á mér sem ég geri mér grein fyrir að ég þarf að lifa með það sem eftir er ævinnar. Ég held að það sé skynsamlegt að finna leið til að lifa með þessum myndum,“ segir hann.