Prinsinn fyrr­verandi deildi trúnaðar­upp­lýsingum með Ep­stein

Þar kemur fram að tölvupóstar úr Epstein-skjölunum sem voru birt nýlega sýni að prinsinn fyrrverandi deildi skýrslum með Epstein um heimsóknir sínar sem viðskiptasendiherra til Singapúr, Hong Kong og Víetnam auk þess sem hann deildi með honum trúnaðarupplýsingum um fjárfestingartækifæri.

Í frétt BBC segir að viðskiptasendiherrum beri að gæta trúnaðar um viðkvæmar upplýsingar sem geti varðað viðskipti eða stjórnmál sem snerti opinberar heimsóknir þeirra. Samkvæmt BBC höfðu þau samband við Andrew, eða Andrés eins og hann hefur verið kallaður á Íslandi, en hann hefur ekki svarað fyrirspurnum fjölmiðilsins.

Andrés hefur statt og stöðugt þvertekið fyrir að hafa gert nokkuð rangt af sér og vísað til þess að það eitt og sér að vera nefndur í skjölunum þýði ekki að hann hafi gert nokkuð rangt af sér.

Í frétt BBC segir að í tölvupóstum sem Andrés hafi sent Eptein 7. Október árið 2010 hafi hann fjallað um væntanlegar opinberar ferðir sínar sem viðskiptasendiherra til Singapúr, Víetnam, Shenzhen í Kína og Hong Kong, þar sem viðskiptafélagar Epsteins voru í fylgd með honum.

Eftir ferðina, þann 30. nóvember, virðist hann svo hafa áframsent opinberar skýrslur um þessar heimsóknir, sem þáverandi sérstakur aðstoðarmaður hans, Amit Patel, sendi honum, til Epsteins, fimm mínútum eftir að hafa fengið þær.

Sagðist síðast hafa hitt hann í desember 2010

Í viðtali við BBC Newsnight árið 2019 sagði Andrés að hann hefði síðast hitt Epstein í desember árið 2010 til að binda enda á vináttu þeirra. Í skjölunum megi sjá að á aðfangadag það sama ár hafi hann sent Epstein tölvupóst með trúnaðarupplýsingum um fjárfestingartækifæri í Afganistan, sem breski herinn hafði umsjón með á þeim tíma.

Á þessum tíma var Epstein þegar dæmdur kynferðisbrotamaður.

Í frétt BBC er haft eftir Sir Vince Cable, sem þá var viðskiptaráðherra, að hann hafi ekki heyrt af þessu áður eða vitað að Andrés hefði deilt upplýsingunum með Epstein.

Í frétt BBC segir að Andrés hafi svo í öðrum tölvupósti, dagsettum 9. febrúar 2011, stungið upp á því að Epstein gæti fjárfest í einkafjárfestingarfyrirtæki sem hann heimsótti viku áður.

Andrés hefur verið undir smásjá í mörg ár vegna fyrri vináttu sinnar við Epstein. Hann var sviptur konunglegum titlum sínum í október á síðasta ári í kjölfar ásakana um kynferðisofbeldi og vegna tengsla hans við Epstein. Eitt fórnarlamba Epstein Virginia Guiffre hefur sakað prinsinn um að hafa brotið á sér þegar hún var á táningsaldri. Hann hefur ávallt neitað sök.

Fyrr í febrúar flutti hann frá heimili sínu í Windsor til Sandringham-setursins í Norfolk. Í breskum götublöðum var svo fullyrt í dag að Andrési hafi verið hent út af heimili sínu á miðnætti í vikunni og gert að flytja í annað húsnæði á vegum konungshallarinnar. Þetta fullyrða bresk götublöð en flutningarnir eru sagðir hafa átt sér stað aðfaranótt mánudagsins.