Krist­rún bætti sig um þrettán sæti

Kristrún endaði í 61. sæti í undankeppninni og var því ekki í hópi þeirra þrjátíu fremstu sem komust áfram. Hún bætti sig hins vegar um þrettán sæti frá því í sprettgöngunni í Peking fyrir fjórum árum.

Hún fór krefjandi 1,5 kílómetra brautina í dag, þar sem keppt var með hefðbundinni aðferð, á 4:09,30 mínútum og varð 33,09 sekúndum á eftir hinni sænsku Linn Svahn.

Svíar tóku þrjú efstu sætin því Jonna Sundling og Johanna Hagström komu næstar á eftir Svahn í undankeppninni, og fjórði Svíinn, Maja Dahlqvist, varð svo sjöunda.

Nú tekur við undankeppnin í sprettgöngu karla þar sem Ísland á einnig fulltrúa því Dagur Benediktsson keppir þar í sinni annarri grein á leikunum.

Kristrún verður aftur á ferðinni á fimmtudaginn þegar hún keppir í 10 km göngu með frjálsri aðferð.