Bylting í út­sendingum frá ís­lenskum körfu­bolta

Þetta kemur fram í tilkynningu frá Körfuknattleikssambandi Íslands í dag.

Stöðin er afrakstur samstarfs KKÍ og SÝN Sport en á henni verða beinar útsendingar frá öllum leikjum í 1. deild karla og kvenna, auk leikja í 2. og 3. deild sem og í yngri flokkum.

Nú er nýlokinni bikarhelgi í íslenskum körfubolta þar sem hægt var að fylgjast með úrslitaleikjum í yngri flokkum á sportrásum Sýnar, og nýja stöðin mun að sama skapi veita áhorfendum tækifæri til að fylgjast með yngri flokkum í úrslitakeppni eftir því sem kostur er.

Innkoma stöðvarinnar þýðir að aldrei hafa jafnmargar beinar útsendingar frá íslenskum körfubolta staðið til boða.

Myndbandadómgæsla nýtt í yngri flokkum

Samstarf Sýnar og KKÍ felur einnig í sér að innleidd verður myndavélatækni sem gerir körfuboltafélögunum, þjálfurum, dómurum og leikmönnum kleift að fá mun betri innsýn en áður varðandi myndefni, tölfræði og gögn um leiki. 

Þá segir í tilkynningu að myndbandadómgæsla muni taka miklum framförum og verða nýtt í mun fleiri leikjum en áður, bæði í meistaraflokkum og yngri flokkum.

Í opinni dagskrá í febrúar

Útsendingar hefjast dagana 11.-12. febrúar þegar allir leikir í 1. deild verða sýndir í beinni á KKÍ TV. Í febrúar verða allir leikir aðgengilegir í opinni dagskrá en frá og með 1. mars verður KKÍ TV rekið sem áskriftarþjónusta. Verðið á KKÍ TV verður 1.990 kr. á mánuði. KKÍ TV verður aðgengilegt í gegnum myndlykla Sýnar og SÝN sjónvarps appið.