Elín í 43. sæti en Sonja fékk byltu

Þær tvítugu Elín og Sonja voru báðar að þreyta frumraun sína á Vetrarólympíuleikum er þær renndu sér niður í stórsviginu í morgun og tókst nokkuð vel til áður en kom að síðari ferðinni í greininni eftir hádegið.

Elín missti nokkrar sekúndur strax í upphafi þegar henni skreikaði lítillega fótur þegar hún ræsti ferðina. Hún fór síðari ferð dagsins á 1:16,93 og var á 2:27,21 samtals, tæpum 14 sekúndum á eftir hinni ítölsku Brignone sem fagnaði sigri.

Elín hafnaði í 43. sæti.

Sonja Lí fór í brekkuna fljótlega á eftir Elínu en hún hafði verið tveimur sekúndum hægari en landa hennar í fyrri ferð dagsins.

Hún lenti í vandræðum og lenti á einu hliðanna eftir að hafa runnið til í brautinni. Hún féll til jarðar og virtist snúa aðeins upp á hnéð en stóð blessunarlega á lappir og renndi sér niður.

Sonja féll því úr keppni í greininni.

Hvorki Elín né Sonja hafa lokið keppni á leikunum. Báðar verða þær í eldlínunni á miðvikudaginn kemur er þær keppa í svigi.