Jón Erik meðal þrjá­tíu efstu og fer fyrstur af stað á eftir

Aðeins 46 af 96 keppendum kláruðu brautina en skyggnið var mjög slæmt og aðstæður urðu meira krefjandi eftir því sem leið á keppnina.

Jón Erik svigaði vel og var í 31. sæti þegar hann kláraði sína ferð. Hann fór ferðina á tímanum 1:04,51 og var 8,37 sekúndum á eftir þeim efsta.

Þegar Ítalinn Tobias Kastlunger var dæmdur úr leik stökk Jón Erik upp í 30. sætið og mun því skíða fyrstur í seinni ferðinni klukkan 12:20.

Þetta er seinni keppni Jóns Eriks á Vetrarólympíuleikunum. Hann keppti í stórsvigi um helgina en hrasaði í seinni ferðinni og náði ekki sæti.