Stutt gaman hjá stelpunum okkar í brekkunni

Um var að ræða aðra grein sem þær stöllur taka þátt í á yfirstandandi leikum eftir að hafa keppt í stórsvigi á sunnudaginn var. Elín lenti þar í 43. sæti en Sonja Lí féll við í seinni ferð stórsvigsins og datt því úr keppni.

Þær Elín og Sonja voru seinar af stað, númer 77 og 82 í röðinni, og brautin var orðin heldur erfið.

Margar féllu úr keppni í dag, þá sérlega þegar seig á síðari hlutann, en aðeins 61 af 90 keppendum var á löglegum tíma.

Elín var fyrri til í brekkuna í dag. Hennar ferð entist skammt þar sem henni skrikaði fótur og hún missti af hliði á brautinni. Hún fer því ekki seinni ferðina eftir hádegið og hefur lokið keppni á leikunum þetta árið.

Sonja Lí lenti þá í svipuðum vandræðum. Hún missti jafnvægið en tókst að redda sér. Hún var hins vegar dottin úr takti og nokkrum metrum neðar fór hún út fyrir brautina. Sonja hefur því einnig lokið keppni á leikunum þetta árið.

Reynslan stendur hins vegar eftir fyrir þær Elínu og Sonju sem báðar eru aðeins tvítugar og að keppa á sínum fyrstu leikum.

Greinin samanstendur af tveimur ferðum niður brekkuna en seinni umferðin hefst klukkan 12:30.

Bandaríska goðsögnin Mikaela Schiffrin leiðir keppnina fyrir síðari ferð dagsins. Hún fór fyrri ferð sína á 47,13 sekúndum en Lena Durr frá Þýskalandi er önnur á 47,95.