Engin við­varandi markaðs­setning frá 2023

Hjörtur Atli Guðmundsson, ráðgjafi í ferðaþjónustu, birti pistil á dögunum þar sem hann segir Ísland hafa sofið á verðinum í markaðssetningu. Einn stærsti ferðasöluaðili heims sýnir til dæmis Tromsö í Noregi sem fyrsta áfangastað hjá þeim ferðamönnum sem leita að norðurljósaferðum en Icelandair tilkynnti nýverið að félagið muni hefja flug til Tromsö í október.

Oddný Arnarsdóttir hjá Íslandsstofu segir verulega hafa dregið úr fjármagni til neytendamarkaðssetningar. Aðspurð hvort stjórnvöld hafi dregið lappirnar segir Oddný viðvarandi markaðssetningu ekki hafa verið til staðar frá 2023, eftir að meira en tveimur milljörðum var varið í markaðssetningu tvö ár þar á undan.

„Síðan þá hafa þetta verið samtals – sem sagt á þremur árum – í kringum 350 milljónir í heildina í neytendamarkaðssetningu. Þetta hefur að sjálfsögðu svona áhrif en við erum í mjög góðu og virku samtali við stjórnvöld,“ segir Oddný.

Góðu starfi hafi verið sinnt á viðskiptatengslamarkaði en ekki hefur orðið aukning ferðamanna frá árinu 2018. Íslandsstofa horfi ekki bara í fjölda ferðamanna heldur hvað þeir skilji eftir sig.

„Við þurfum að muna að hér vorum við náttúrulega, árið 2010 vorum við áfangastaður þar sem að fólk heimsótti Ísland bara yfir sirka þrjá mánuði. Í dag erum við allan ársins hring hér með ferðaþjónustu allt landið um kring.“

Byggja upp áhuga á eftirspurnarmörkuðum

Hlutverk Íslandsstofu sé að byggja upp áhuga á eftirspurnarmörkuðum og markmiðið að minnka árstíðarsveiflur.

„Við sjáum til dæmis að við fórum í aðgerð núna undir lok síðasta árs þar sem við vorum með svona markvissa markaðsvinnu í norðurljósaherferðinni í Bretlandi, The Auroras, þar sem við vorum með auglýsingar, PR og samfélagsmiðla með skýran fókus á vetur á Íslandi. Þessi herferð náði til tæplega 28 milljón einstaklinga á mjög skömmum tíma,“ sagði Oddný Arnarsdóttir, fagstjóri ferðaþjónustu hjá Íslandsstofu.