Nýjasta að­gerð Lindsey Vonn tók sex klukku­tíma

Vonn hlaut flókið sköflungsbrot í slæmri byltu í brunkeppni Ólympíuleikanna í Cortina d'Ampezzo sunnudaginn 8. febrúar. Þetta gerðist aðeins rúmri viku eftir að hún sleit krossband í byltu í Crans Montana. Hún fór í fjórar aðgerðir á sjúkrahúsinu í Treviso á Ítalíu áður en hún var flutt heim til Bandaríkjanna.

Nú hefur hún gengist undir fimmtu aðgerðina.

„Bara stutt uppfærsla. Síðasta aðgerðin mín gekk vel og hún tók rúmlega sex klukkustundir. Ég hef verið að ná mér eftir aðgerðina en verkirnir hafa verið erfiðir viðureignar. Þetta gengur hægt en ég vona að ég komist fljótlega út af sjúkrahúsinu. Takk allir fyrir stuðninginn,“ skrifar Vonn í færslu sinni á samfélagsmiðlum.

Vonn sneri aftur til keppni fyrir jólin 2024. Þá hafði hún ekki keppt síðan 2019. Á leið sinni á Ólympíuleikana í ár náði hún nokkrum toppsætum, þar á meðal tveimur heimsbikarsigrum.

Leikarnir á Ítalíu voru stóra markmiðið hennar, en draumurinn um fyrstu Ólympíugullverðlaunin síðan í bruninu á Ólympíuleikunum í Vancouver 2010 brast með hinni dramatísku byltu í Cortina.