Sex víta­spyrnur fóru for­görðum í tauga­trekkjandi undanúr­slita­leik

Um seinni leik liðanna í einvígi undanúrslitanna var að ræða en þeim fyrri, sem fram fór á heimavelli Lazio, hafði lokið með 2-2 jafntefli. 

Mikil spenna var í leik kvöldsins og virtist Alessio Romagnoli vera fara langt með að tryggja Lazio farmiðann í úrslitaleikinn er hann skoraði fyrsta mark leiksins á 84.mínútu og kom Lazio yfir, bæði í leiknum og í einvíginu. 

En aðeins um tveimur mínútum eftir mark Romagnoli jafnaði Mario Pasalic metin fyrir Atalanta og reyndist það síðasta markið í venjulegum leiktíma. Stóðu leikar 1-1 í leiknum, 3-3 í einvíginu. Því þurfti að grípa til framlengingar. 

Ekkert mark var skorað í framlengingunni og varð því ljóst að einvígið myndi ráðast í vítaspyrnukeppni. 

Taugar leikmanna voru þandar og það sást á nýtingu beggja liða í vítaspyrnukeppninni. Af þeim níu vítaspyrnum sem teknar voru fóru sex þeirra forgörðum og aðeins þrjár enduðu í netinu.

Lazio reyndist hlutskarpara, skoraði úr tveimur vítaspyrnum sínum á móti einni hjá Atalanta. Það er því Lazio sem fer áfram í úrslitaleikinn.

Þar bíður viðureign gegn Inter sem sló Como úr leik í gærkvöldi. Úrslitaleikurinn fer fram þann 13. maí næstkomandi í Róm á Ólympíuleikvanginum þar í borg sem vill svo til að er heimavöllur Lazio.