„Lé­legi leikurinn hans er sjöa“

Arnar og Kjartan Henry Finnbogason dásömuðu Rice í Meistaradeildarmörkunum, eftir 1-0 sigur Arsenal í gær, og Arnar benti á hve ótrúlega stöðugur Englendingurinn væri í sínum leik.

„Lélegi leikurinn hans er „sjöa“. Það eru svo margir leikmenn sem eiga leik upp á níu en droppa svo niður í tvistinn. Jafnvel þó að hann gangi ekki heill til skógar þá sér hann til þess að leikur sinn sé alltaf sjöa,“ sagði Arnar en umræðuna má sjá hér að neðan.

„Ég held að það sé ekki til sá fermetri á vellinum sem hann var ekki búinn að kovera,“ sagði Arnar þegar hann ræddi um frammistöðu Rice í gærkvöld.

„Hann er elegant hlaupari, þegar hann tekur þessi löngu skref sín. Það eru ekki margar sexur sem geta gert þetta [sagt þegar Rice hljóp fram kantinn og hristi af sér varnarmann]. Svo er hann sterkur í boxinu, átti sinn þátt í markinu…

Það hefur verið gagnrýnt að það vanti aðeins upp á mörkin hans, og hann er stór og sterkur strákur sem á að taka meira til sín í boxinu, en klárlega átti hann lungann af leiknum að sinna meira varnar- en sóknarhlutverki. Arsenal er líka eitt af fáum toppliðum í heiminum sem sættir sig við að vera í lágvörn hluta af leik. Flest lið væru farin að stíga upp og pressa,“ sagði Arnar.

Sjokk fyrir líkamann að fá smá pásu

Kjartan Henry benti á að kærkomin hvíld í síðasta deildarleik gæti hafa gert að verkum að Rice var alveg sérstaklega vinnusamur og öflugur í gær.

„Hann er vanur að spila 90 mínútur í öllum leikjum. Ég veit að það er eitthvað að í mjöðminni á honum en hann hefur bitið á jaxlinn og spilað nánast allar mínútur en hann fékk hálftíma pásu í síðasta leik, gegn Fulham. Ég held að Arteta hafi verið mjög feginn að komast í 3-0 því þá þorði hann að taka hann út af. Ég held að líkaminn hafi verið í sjokki að hafa fengið smá breik, því hann hljóp fyrir allan peninginn í kvöld.“