Lokar Sjoppunni eftir sex­tán ára rekstur

„Árið 2010 var ég 23 ára, nýskriðinn úr Tækniskólanum og fullur af hugmyndum um hvernig ég gæti komið með nýjar og ferskar áherslur inn á hársnyrtimarkaðinn. Úr þeim draumórum fæddist Sjoppan. Sjoppan hefur verið lærdómsríkt ævintýri og hef ég kynnst ótal mörgu frábæru fólki á þessu rúmlega 16 ára ferðalagi. Ég hef lært margt, þroskast, mótast og vaxið sem bæði fagmaður og persóna,“ segir Kristján í færslu sem hann skrifaði um lokunina á Facebook sem er birt hér með hans leyfi. 

Hann segir að núna, sextán árum seinna, hafi hann mikið velt því fyrir sér hvert líf hans sé að stefna og hvað hann vilji leggja áherslu á.

„Fyrirtækjarekstur er rússíbani og á sína skemmtilegu tíma í bland við erfiða tíma, fyrirtæki er líka eins og barn sem nær aldrei fullum þroska og þarf alltaf aðhald og flytur aldrei að heiman. Með árunum finn ég að ástríða mín og metnaður gagnvart faginu sem ég er í hefur aukist en áhugi og drifkraftur fyrir því að stjórna og reka fyrirtæki hefur minnkað,“ segir hann og að það veiti honum fátt meiri ánægju en að fá skemmtilegan viðskiptavin í stólinn.

Næsti kafli eigi að snúast um það sem er skemmtilegt

„Ég vil að næsti kafli í mínu lífi snúist um að gera meira af því og til þess að ég geti það þarf ég að beina allri minni orku í að halda áfram að bæta mig og vaxa sem hársnyrtir – bæði í vinnubrögðum og þjónustu.“

Þess vegna hafi hann ákveðið að loka Sjoppunni og þó svo að hann kveðji stofuna með stolti, söknuði og „smá bugun“ sé hann fyrst og fremst spenntur fyrir nýjum kafla á Kompaníinu frá og með næstu mánaðamótum.

„Næstu tvær vikur á Sjoppunni verða skemmtilegar, tilfinningaþrungnar og vonandi fullar af góðum stundum. Ég hlakka til að klára þennan kafla með stæl með vinnufélögunum mínum og öllum þeim sem hafa gert Sjoppuna að því sem hún hefur verið í gegnum árin. Og auðvitað hlakka ég til að taka á móti öllum sem vilja kíkja við – hvort sem það er í stólinn góða eða bara næla sér í einn síðasta Sjoppukaffibolla,“ segir hann að lokum.