Varði ekki eitt einasta skot en vann titilinn

Safonov var eini leikmaðurinn í byrjunarliði PSG í gær sem ekki var í byrjunarliðinu fyrir ári síðan þegar liðið vann Inter 5-0 og varð Evrópumeistari í fyrsta sinn. Hann fylgdist þá með af varamannabekknum á meðan að Gianluigi Donnarumma hélt marki PSG hreinu. Í gærkvöld spilaði Safonov og varð meistari en varði þó ekki eitt einasta skot, í 120 mínútur og vítaspyrnukeppni.

Kai Havertz kom Arsenal yfir með frábæru skoti úr afar þröngu færi snemma leiks. Þrátt fyrir að leikurinn hafi svo verið framlengdur og endað í vítaspyrnukeppni þá var þetta eina skiptið þar sem Safonov hefði mögulega getað varið skot.

Fleiri skottilraunir Arsenal fóru nefnilega ekki á markrammann. Bæði víti liðsins sem fóru forgörðum í vítaspyrnukeppninni fóru ekki á markið. Eberechi Eze skaut framhjá og miðvörðurinn Gabriel skaut svo yfir úr lokaspyrnunni en hefði þurft að skora til að knýja fram bráðabana.

David Raya hafði aðeins meira að gera í marki Arsenal en hann varði tvö skot í venjulegum leiktíma og eitt í framlengingunni, áður en hann varði svo eina af spyrnum PSG-manna í vítaspyrnukeppninni, auk þess að hafa gert vel í að verjast föstum fyrirgjöfum PSG, en það dugði ekki til. Eina markið sem Raya fékk á sig í venjulegum leiktíma kom af vítapunktinum, þegar Ousmane Dembélé jafnaði metin á 65. mínútu.