For­stjóri Kviku hyggst láta af störfum

Frá þessu er greint í kauphallartilkynningu frá Kviku. Þar segir að hann muni gegna starfi forstjóra út árið, en að stjórn félagsins muni nýta tímann fram undan til ráðningar á nýjum forstjóra.

Ármann tók við sem forstjóri Kviku árið 2017, var um tíma aðstoðarforstjóri félagsins og hefur síðan aftur gegnt stöðu forstjóra síðastliðin þrjú ár.

Haft er eftir Ármanni í tilkynningunni að árin hjá Kviku hafi verið eitt allra skemmtilegasta tímabilið í hans lífi.

„[O]g það hafa verið forréttindi að vinna með þeim frábæra hópi fólks sem byggt hefur upp einstakt félag og náð árangri sem fá fyrirtæki á Íslandi geta státað af,“ er haft eftir honum í tilkynningunni, þar sem hann þakkar jafnframt stjórn, stjórnendum og öllu starfsfólki.

Eftir Sigurði Hannessyni stjórnarformanni er haft að Ármann eigi stóran þátt í árangri Kviku á síðustu árum ásamt öflugum hópi stjórnenda og starfsmanna. Fyrir hönd stjórnar þakkar hann Ármanni fyrir sín störf. 

„Stjórn virðir ákvörðun hans um að láta af störfum,“ er haft eftir Sigurði.