Þjálfari heims­meistaranna segir hegðun Argentínu ó­þolandi og óásættanlega

Argentínumenn gengu hart fram í úrslitaleiknum og upp úr sauð í leikslok. Þar fóru fremstir í flokki Leandro Paredes og Nahuel Molina sem réðust að Rodri og Eric García. Paredes réðst einnig á Gavi.

„Á meðan þessu stóð tók ég ekki eftir þessu. Ég var að fagna og faðma leikmennina,“ sagði De La Fuente við spænska sjónvarpsstöð.

„Hvað sem því líður er þetta óþolandi og óásættanleg hegðun sem á ekki að líðast. Þessir stóru leikmenn, sem ég hrósaði í aðdraganda leiksins og held áfram að mæra, eru frábærir með framúrskarandi þjálfara og þeim líður eflaust eins og okkur að sjá þessi viðbrögð.“

FIFA hefur sett af stað rannsókn á framkomu argentínsku leikmannanna eftir úrslitaleikinn til að komast að því hvort þeir hafi gerst sekir um brot á agareglum sambandsins.

Enzo Fernández var rekinn út af í uppbótartíma venjulegs leiktíma í úrslitaleiknum og svo virtist sem Paredes hefði einnig fengið rauða spjaldið í leikslok. Ekkert var hins vegar um það í skýrslu dómara leiksins.

Spánn vann úrslitaleikinn, 1-0. Ferran Torres skoraði eina markið í upphafi seinni hálfleiks framlengingarinnar.