Diljá með tvennu í öruggum Evrópusigri

Mitrovica er meistaralið síðasta tímabils í Kósovó en mátti sín lítils gegn Noregsmeisturunum í dag. Brann leiddi með fjórum mörkum í hálfleik og bætti svo einu marki við í seinni hálfleik.

Diljá skoraði fyrsta mark leiksins á 7. mínútu og setti svo fjórða mark liðsins á 35. mínútu. Amalie Eikeland og Anna Aahjem skoruðu þess á milli. Diljá var svo nýfarin af velli þegar Heidi Halbmayr skoraði fimmta markið á 74. mínútu.

Brann mun mæta annað hvort Ferencvaros eða PAOK í úrslitaleik um sæti í næstu umferð undankeppni Meistaradeildarinnar. Með sigrinum í dag er Brann búið að tryggja sér að minnsta kosti sæti í undankeppni Evrópubikarsins.

Riðillinn er spilaður á Keruleti leikvanginum í Búdapest í Ungverjalandi, heimavelli Ferencvaros.