Ástin sem eftir er til­nefnd til kvikmyndaverðlauna Norður­landa­ráðs

Tilnefndar kvikmyndir í ár hafa hlotið viðurkenningu bæði heima fyrir og á alþjóðavettvangi, þar á meðal ein sem hlaut Óskarsverðlaunin.

Þetta er í fjórða sinn sem Hlynur Pálmason er tilnefndur til Kvikmyndaverðlauna Norðurlandaráðs en tilnefningarnar hafa komið fyrir hönd bæði Íslands og Danmerkur. Þá er þetta í fimmta sinn sem framleiðandinn Anton Máni Svansson er tilnefndur og í fjórða sinn fyrir samstarf með Hlyni.

Fyrsta tilnefning Hlyns kom fyrir Vetrarbræður (Vinterbrødre), sem var framlag Danmerkur til verðlaunanna árið 2018 (sem Kona fer í stríð vann). Anton Máni var einn framleiðenda Vetrarbræðra, en árið áður hafði hann verið tilnefndur fyrir íslensku kvikmyndina Hjartastein sem var leikstýrt af Guðmundi Arnari Guðmundssyni. 

Hlynur var aftur tilnefndur árið 2019, þá fyrir Hvítan, hvítan dag en hún var framlag Íslands og var hann tilnefndur sem bæði leikstjóri og handritshöfundur ásamt framleiðandanum Antoni Mána Svanssyni. Þriðja tilnefning Hlyns kom árið 2022 fyrir Volaða land (Vanskabte Land/Godland). Hann var þá enn á ný fulltrúi Danmerkur sem leikstjóri og handritshöfundur myndarinnar og Anton Máni einn framleiðenda.

Þetta er því í fjórða sinn sem Hlynur Pálmason og Anton Máni Svansson hljóta tilnefningu saman til kvikmyndaverðlauna Norðurlandaráðs.

Kvikmyndaverðlaun Norðurlandaráðs voru stofnuð árið 2002 og hafa verið veitt árlega frá árinu 2005. Þau eru ein virtustu menningarverðlaun Norðurlandanna og eru veitt norrænni leikinni kvikmynd eða heimildarmynd sem hefur verið sýnd í kvikmyndahúsum.

Opinber tilnefningarathöfn fer fram á Alþjóðlegu kvikmyndahátíðinni í Haugasundi í Noregi þriðjudaginn 25. ágúst. Þar munu hinir tilnefndu kvikmyndagerðarmenn hittast og kynna myndir sínar fyrir hátíðargestum.

Kvikmyndirnar sem tilnefndar eru:

• Begyndelser (Beginnings) - Danmörk. Leikstjóri er Jeanette Nordahl, handritshöfunar eru Rasmus Birch og Jeanette Nordahl og framleiðendur eru Eva Jakobsen, Katrin Pors og Mikkel Jersin.
• Birita - Færeyjar. Leikstjóri og handritshöfundur er Búi Dam og framleiðendur eru Jón Hammer, Durita Sumberg og Mark Steele.
•  Jossain on valo joka ei sammu (A Light That Never Goes Out) - Finnland. Leikstjóri og handritshöfundur er Lauri-Matti Parppei og framleiðandi er Ilona Tolmunen.
• Ástin sem eftir er (The Love That Remains) - Ísland. Leikstjóri og handritshöfundur er Hlynur Pálmason og framleiðendur eru Anton Máni Svansson og Katrin Pors.
• Affeksjonsverdi (Sentimental Value) - Noregur. Leikstjóri er Joachim Trier, handritshöfundar eru Eskil Vogt og Joachim Trier og framleiðendur eru Maria Ekerhovd og Andrea Berentsen Ottmar.
• Kevlarsjäl (Kevlar Soul) - Svíþjóð. Leikstjóri er Maria Eriksson-Hecht, handritshöfundur er Pelle Rådström og framleiðendur eru Ronny Fritsche og Lizette Jonjic.

• Grænland sendi ekki inn framlag árið 2026.

Í dómnefnd Kvikmyndaverðlauna Norðurlandaráðs 2026 sitja Jacob Ludvigsen  frá Danmörku, Jan Berg Jørgensen frá Færeyjum, Marjo Pipinen frá Finnlandi, Jóna Finnsdóttir frá Íslandi, Anne Gjelsvik frá Noregi og Jonas Holmberg frá Svíþjóð.

Sigurvegarar Kvikmyndaverðlauna, Tónlistarverðlauna, Bókmenntaverðlauna, Barna- og unglingabókmenntaverðlauna og Umhverfisverðlauna Norðurlandaráðs 2026 verða tilkynntir þann 20. október næstkomandi. 

Sigurvegararnir fá afhenta verðlaunastyttu og peningaverðlaun sem nema 300 þúsund dönskum krónum (rúmlega 5,6 milljónum íslenskra króna). Verðlaunafénu fyrir kvikmyndaverðlaunin er skipt jafnt á milli handritshöfunda, leikstjóra og framleiðanda til að endurspegla að kvikmyndalist sé unnin í nánu samstarfi þessara þriggja lykilaðila.