Tíma­mót hjá Heklu: Kveðja Lauga­veginn eftir rúma sex ára­tugi

Þetta staðfestir Friðbert Friðbertsson forstjóri Heklu bílaumboðs í samtali við blaðamann Vísis en hann segir Heklu-fánann hafa verið dreginn niður í hinsta sinn á Laugaveginum fyrr í dag, laugardaginn 19. september.

Mikil tímamót

„Þetta er náttúrulega mikil saga. Fyrirtækið er búið að vera síðan 1960, eða 61, við Laugaveginn og áður á Hverfisgötu svo að þetta eru mikil tímamót,“ segir hann og bætir við að flutningarnir yfir í Þorraholt hafi gengið tiltölulega vel. Greint var frá því í vor að öll starfsemi Heklu myndi sameinast undir einu þaki í Garðabænum í lok sumars.

„Upphaflega ætluðum við að fara annað en eins og er hjá Reykjavík hefur það verið þannig að flest stærri fyrirtæki hverfa frá Reykjavík, þá hafa þau fengið litla fyrirgreiðslu og svona vandræðagangur sem hefur verið þar,“ útskýrir Friðbert og segir alla innanhúss hafa tekið vel í flutningana enda verði aðstaða fyrir bæði starfsfólk og viðskiptavini með besta móti í nýja húsnæðinu.

„Þetta er allt búið að ganga ótrúlega vel, húsbyggingin og flutningar og fólk er bara spennt og ánægt með þetta. Aðstaða viðskiptavina og starfsfólks verður miklu betri hérna að öllu leyti og það eru allir rosa spenntir.“

Dálitlar breytingar fyrir fólk

Hann segir alla starfsmennina halda vinnunni en það sé líklegt að þeir sem hafi starfað hvað lengst á Laugaveginum muni þurfa tíma til að venjast nýju vinnuumhverfi.

„Elsti starfsmaðurinn er búinn að vera 47 ár, svona sá sem lengst hefur starfað hérna, 47 eða 48 ár og það eru dálitlar breytingar fyrir svona fólk að fara á nýjan stað,“ segir Friðbert.

Síðustu viðskiptavinirnir á Laugaveginum hafi ekki haft hugmynd um að verslunin þar væri að loka en þau hafi fengið blómavönd og kampavín enda um tímamótakaup að ræða.

„Nú er bara þeirri sögu lokið og við erum bara að tæma húsið og það er bara, það er raunverulega allt meira og minna komið,“ segir Friðbert og bætir við að þau hlakki verulega til að bjóða gamla og nýja viðskiptavini velkomna á nýja staðinn.

Friðbert segist þegar hafa tekið eftir miklum áhuga og að það hafi ófáir litið við á nýja staðnum og skoðað sig um.

„Það eru sumir sem eru að kíkja í heimsókn og það er bara voða gaman og allir velkomnir auðvitað. Fyrrverandi starfsmenn líka að kíkja og sjá sem eru komnir á eftirlaun og svona,“ segir Friðbert.