Valsstúlkur lögðu Noregsmeistara

Íslandsmeistarar Vals í knattspyrnu lögðu Noregsmeistarana í Röa að velli 4-1 í fyrstu umferð Evrópukeppni félagsliða en leikurinn fór fram í Finnlandi. Margrét Lára Viðarsdóttir skoraði tvö mörk og þær Dóra María Lárusdóttir og Guðný Óðinsdóttir sitt markið hvor. Valur mætir finnska liðinu FC United á morgun en Finnarnir sigruðu Pärnu frá Eistlandi 2-0. Sigur Vals er sérlega glæsilegur en Röa varð Noregsmeistari í fyrra. Ragnar Austad, þjálfari norska liðsins, segir í samtali við NTB-fréttastofuna að sigur Vals hafi verið fyllilega verðskuldaður. 36 lið taka þátt í keppninni og spila í 9 riðlum. Sigurvegararnir komast áfram í næstu umferð sem verður 13.-17. september.