Stytta af Karl Malone afhjúpuð í Salt Lake City

Sérstök athöfn var haldin fyrir leik Utah Jazz og Washington Wizards í nótt til að heiðra Karl Malone sem lék með liði Utah í 18 af þeim 19 árum sem hann spilaði í NBA deildinni á ferlinum. Treyja Malone var hengd upp í rjáfur í Delta Center og stytta úr bronsi afhjúpuð af honum fyrir utan höllina, við hlið styttunnar sem fyrir skömmu var afhjúpuð af félaga hans John Stockton.

Karl Malone er annar stigahæsti leikmaður NBA deildarinnar frá upphafi á eftir Kareem Abdul-Jabbar, en hann og John Stockton mynduðu líklega skæðasta tvíeyki í sögu NBA. Þeir hafa nú báðir fengið afhjúpaðar bronsstyttur af sér fyrir utan höllina, fengið götur nefndar eftir sér og einnig hafa treyjur þeirra verið hengdar upp hlið við hlið í rjáfri Delta Center þar sem þeir léku saman í 18 ár.

Saman fleyttu þeir liði Utah Jazz tvisvar sinnum alla leið í úrslit NBA, en töpuðu í bæði skiptin fyrir Michael Jordan og félögum í Chicago Bulls. Malone var valinn verðmætasti leikmaður deildarinnar árið 1997 og aftur árið 1999.

"Hann bar þetta félag á herðum sér lengur en nokkur gerir sér grein fyrir og gerði það alltaf með mikilli reisn. Ég var bara heppinn að spila við hliðina á besta kraftframherja allra tíma í 18 ár," sagði John Stockton um félaga sinn.