Ryanair vill Aer Lingus

Írska lággjaldaflugfélagið Ryanair hefur gert tilboð í allt hlutafé írska flugfélagsins Aer Lingus. Tilboðið hljóðar upp á 1,48 milljarða evrur eða tæplega 130 milljarða íslenskra króna. Ryanair hefur þegar keypt 16 prósent í flugfélaginu. Forstjóri Ryanair segir þetta einstakt tækifæri til að byggja upp eitt sterkt flugfélag á Írlandi.

Michael O'Leary, forstjóri flugfélagsins, segir að gangi kaupin muni litlar breytingar verða gerðar á Aer Lingus. Flugfélögin muni keppa eftir sem áður á markaði og fljúga til sömu staða og fyrr, að hans sögn.

Aer Lingus var að langmestu leyti í eigu ríkisins en stærstur hluti þess var seldur í almennu hlutafjárútboði í kauphöllunum í Lundúnum í Bretlandi og í Dublin á Írlandi í vikunni á útboðsgenginu genginu 2,2 evrur á hlut. Það samsvarar því að markaðsvirði félagsins nemi 1,13 milljörðum evra eða 99 milljörðum íslenskra króna. Ryanair keypti hins vegar 16 prósent í félaginu á genginu 2,8 evrur á hlut.

Írska ríkið átti 85,1 prósent hlutafjár í flugfélaginu en seldi rúm 50 prósent þess í almennu hlutafjárútboði. Breska ríkisútvarpið segir að verði salan samþykkt þá muni írska ríkið fá ríflega 500 milljónir evra eða 43 milljarða krónur í sinn hlut.