Breska hagkerfið stendur verst allra þróaðra hagkerfa

Breska hagkerfið stendur verst allra þróaðra hagkerfa að mati Alþjóðagjaldeyrissjóðsins. Ísland er ekki í hópnum, enda telst landið nýmarkaður.

Samkvæmt skýrslu Alþjóðagjaldeyrissjóðsins frá í dag verður hagvöxtur á heimsvísu í ár aðeins hálft prósent og hefur ekki verið lægri síðan í Seinni heimsstyrjöldinni. Í október spáði sjóðurinn því að hann yrði tvö komma tvö prósent. Síðan hefur sigið á ógæfu hliðina. Það er mat sjóðsins að hjól efnahagslífsins svo gott sem stöðvist í ár. Marka þurfi nýja stefnu og veita fé í þær fjármálastofnanir sem teljist lífvænlegar.

Sjóðurinn spáir því að samdrátturinn verði tvö komma átta prósent í Bretlandi sem er mesti samdrátturinn í ár hjá þróuðum hagkerfum en Ísland telst þar ekki með enda nýmarkaðsríki samkvæmt skilgreiningum sjóðsins.

Samkvæmt niðurstöðu Institute of Fiscal Studies þurfa Bretar að grípa til niðurskurðar og skattahækkana til að mæta mikilli skuldasöfnun hins opinbera. Hjá foreignpolicy punktur com er Bretland sagt eitt fimm ríkja sem geti hlotið íslensk örlög eða nær algjört efnahagshrun Grikklandi, Lettlandi, Nikaragúa og Úkraínu. Atvinnuleysi verði átta prósent og tuttugu prósent Breta telji sig ekki ráða við skuldir sínar.

Samdrátturinn á evrusvæðinu verður tvö prósent að mati Alþjóðagjaldeyrissjóðsins og eitt komma sex prósent í Bandaríkjunum.

Samdráttur verði einnig nokkur á nýmörkuðum og hjá þróunarríkjum.