Arnór og Ásgeir fylgjast spenntir með NFL

Herbergisfélagarnir Arnór Atlason og Ásgeir Örn Hallgrímsson hafa meðal annars drepið tímann á HM með því að fylgjast með úrslitakeppni NFL-deildarinnar.

Þeir fylgjast báðir vel með og hafa reynt að smita félaga sína í landsliðinu af NFL.

"Ætli Steelers vinni ekki SuperBowl," sagði Arnór en þeir félagar hafa horft þegar það var hægt en stundum hafa þeir þurft að hvíla sig og því slökkt á sjónvarpinu.

"Ég er alltaf að fylgjast meira og meira með og það náði hámarki í ár. Ég er orðinn háður þessu," sagði Ásgeir og þeir hafa verið duglegir að sýna öðrum í liðinu Hard Knock-þættina sem allir ættu að skoða.

"Það er fínt. Við höfum náð leikjunum um helgar vegna spiltíma okkar sem er ánægjulegt. Hinir farnir að fylgjast með og við getum farið að tala um þetta. Við erum að kenna strákunum reglurnar er þeir koma í heimsókn," segja þeir félagar.

Þeir ræða einnig Króataleikinn í viðtalinu hér að ofan.