Björgvin: Ég var með gæsahúð í 30 mínútur

„Ég var með gæsahúð í 30 mínútur," sagði Björgvin Páll Gústavsson markvörður íslenska landsliðsins í handbolta í viðtali við Hörð Magnússon á Stöð 2 sport eftir frábæran sigur liðsins gegn Austurríki.

Hörður spurði markvörðinn hvernig það hefði verið að standa fyrir aftan frábæra vörn Íslands í síðari hálfleik og sagði Björgvin að liðið hefði trúað því að Austurríki ætti ekki séns í síðari hálfleik. „Það var bara múr fyrir framan og þeir voru skíthræddir. Þetta var ótrúlega gaman," sagði Björgvin en hann varði alls 17 skot og þar af 14 í síðari hálfleik þar sem hann var með 65% markvörslu.