Alexander: Erum ekki vélmenni

Það verður ekki sakast við Alexander Petersson vegna tapsins í kvöld en hann var einn fárra íslenskra leikmanna í kvöld sem átti virkilega góðan leik.

"Þetta var mjög erfiður leikur. Þjóðverjar voru mjög góðir og þeirra besti leikur í langan tíma. Heinevetter var góður í markinu. Það er erfitt að segja eitthvað. Við verðum að fara yfir þetta," sagði Alexander.

"Við erum ekki vélmenni og erum stundum þreyttir. Við spilum agressíva vörn og það tekur á. Spánarleikurinn verður að vinnast. Þeir eru með nýtt og ferskt lið og við verðum að gefa allt okkar í þann leik."