LeBron sjóðandi heitur og oddaleikur framundan í Miami

LeBron James bauð upp á eins manns sýningu í 98-79 sigri Miami Heat á Boston Celtics í Boston í sjötta leik liðanna í úrslitum austurdeildar NBA í nótt. LeBron skoraði 45 stig og liðsmenn Boston áttu engin svör.

Boston var í kjörstöðu eftir sigur í fimmta leik liðanna í Miami. Sigur í gærkvöldi hefði komið liðinu í úrslitaeinvígið gegn Oklahoma City Thunder. Liðið var þó alltaf skrefinu á eftir Miami sem landaði nokkuð þægilegum sigri.

„Hann var stórkostlegur og gaf tóninn fyrir lið þeirra. Hann setti niður fjölmörg erfið skot," sagði Doc Rivers þjálfari Boston-liðsins sem fannst hans menn ekki standa sig nógu vel í vörninni gegn LeBron.

LeBron nýtti nítján af 26 skotum sínum en var líka með fimmtán fráköst og fimm stoðsendingar. Það eru bestu tölur sem hafa sést í úrslitakeppninni síðan að Wilt Chamerlain náði 50 stigum, fimmtán fráköstum og sex stoðsendingum í leik árið 1964.

James hefur tvisvar áður upplifað það að detta úr leik í úrslitakeppninni í höllinni í Boston og var greinilegt að hann hafði engan áhuga á að gera það aftur.

„Það var að duga eða drepast fyrir okkur og það er gott að sjá að við gátum náð okkar besta fram eftir tap á heimavelli í síðasta leik,“ sagði James eftir leikinn.

Hjá Boston var leikstjórnandinn Rajon Rondo stigahæstur með 21 stig. Næstir komu Brandon Bass og Kevin Garnett með 12 stig. Vörn Miami var afar ákveðinn í kringum körfuna og þvinguðu liðsmenn Boston til að skjóta fyrir utan. Skyttur heimamanna voru hins vegar ískaldar og settu aðeins niður eitt af fjórtán skotum sínum.

Sjöundi og síðasti leikur liðanna fer fram í Miami aðfaranótt sunnudags. Leikurinn er í beinni útsendingu á Stöð 2 Sport.