Titlaleysi Tiger kom Nicklaus í opna skjöldu

Það kom Jack Nicklaus á óvart að heyra að bið Tiger Woods eftir sigri á risamóti í golfi væri orðin fimm ára löng. Goðsögnin telur þó öruggt að Tiger muni ná meti sínu áður en langt um líður.

Nicklaus vann átján risamót í golfi á sínum tíma en Tiger hefur unnið fjórtán. Sá síðasti kom í hús á Opna bandaríska meistaramótinu árið 2008 en síðan þá hafa aðrir kylfingar skipst á að handleika verðlaunagripina á stóru mótunum.

Nicklaus ræddi við blaðamenn í aðdraganda Masters-mótsins sem hefst á Augusta-vellinum í Georgíufylki á morgun. Virtist Nicklaus ekki alveg með þurrkatíð Tiger á hreinu.

„Í alvöru? Það er frekar langur tími," sagði Nicklaus um fimm ára bið Tiger.

„Hann verður að ráða fram úr þessu. En ef honum tekst það hér verður það mikil hvatning fyrir hann. Miðað við spilamennsku hans í vor gæti tímabilið orðið erfitt falli hlutirnir ekki með honum hérna," sagði Nicklaus.

Margir reikna með því að Tiger vinni sigur á mótinu. Hann ætti að vera fullur sjálfstrausts eftir þrjá sigra í fimm tilraunum á PGA-mótaröðinni það sem af er ári. Hann veit líka hvað þarf til enda fjórum sinnum klæðst jakkanum græna í mótslok á Augusta.

„Ég hef sagt það áður og geri það áfram. Ég reikna enn með því að hann bæti metið mitt," sagði Nicklaus.

Masters hefst óformlega í kvöld þegar hin stórskemmtilega Par 3 keppni fer fram. Keppnin verður í beinni útsendingu á Stöð2 Sport & HD. Útsending hefst klukkan 19.

Sportið á Vísi er á Facebook. Fylgstu með.