Ekkert merkilegri með sig

Frjálsar íþróttir „Þetta er rosalega flott hjá henni,“ sagði Bryndís Ernstsdóttir, móðir Anítu Hinriksdóttur sem um helgina fékk verðlaunin Vonarstjarna evrópska frjálsíþrótta 2013 og þykir því vera efnilegasta frjálsíþróttakona Evrópu. Þetta er mikill heiður fyrir Anítu og íslenskar frjálsíþróttir en hún varð bæði heims- og Evrópumeistari unglinga í 800 metra hlaupi með aðeins sex daga millibili í sumar.

„Menn hljóta að sjá mikið í henni þarna úti því þetta er ekki bara vinsældakosning. Í þessari kosningu taka líka þátt íþróttafréttamenn og formenn sérsambanda. Þeir eru ekki að dæma út frá því hvað var gaman að sjá þetta hjá henni í sumar heldur út frá einhverju sem þeir hafa vit á,“ segir Bryndís um verðlaunin. Hún segir dóttur sína ekki hafa breyst við alla athyglina sem hún fékk í sumar.

„Aníta er bara hún sjálf. Hún er ekkert merkilegri með sig eða að taka sér meira pláss en áður. Hún er bara vel fókuseruð á það sem er fram undan,“ segir Bryndís.

„Vonandi verða þessi verðlaun bara bensín fyrir hana en þetta segir svolítið hvað menn sjá við hana. Ég held að hún sé sjálf svolítið hissa á þessu og hafi alls ekki átt von á þessu þarna úti,“ segir Bryndís en Aníta fékk verðlaunin afhent í Eistlandi á laugardaginn.

Árangur Anítu í 800 metra hlaupi á árinu 2013 er annað besta afrekið í hennar aldursflokki á þessu ári, í áttunda sæti yfir besta afrekið í hennar aldursflokki frá upphafi og í 44. sæti í heiminum í flokki fullorðinna.